Евангелле выдадзена ў Еўеўскай друкарні (Вільня-Еўе), якая дзейнічала з 1610 г. да сярэдзіны XVII ст. у мястэчку Еўе каля Вільні (цяпер г. Вывіс, Літва) і была заснавана праваслаўным Віленскім Свята-Духавым брацтвам ва ўладанні старасты брацтва падкаморыя троцкага Багдана Агінскага. Гэта адно з найбольш маляўнічых, багата ўпрыгожаных выданняў за ўвесь перыяд існавання брацкага беларускага кірылічнага кнігадрукавання. Кніга змяшчае выявы евангелістаў – копіі гравюр Пятра Мсціслаўца з Евангелля 1575 г., аздобленыя рамкамі з наборнага арнаменту. Тытульны аркуш аформлены мастаком кола Мсціслаўца.
Друкарня Віленскага брацтва выпускала свае выданні то ў Вільні, то ў Еўі. Надрукавана было больш за 25 выданняў, пераважна на царкоўнаславянскай мове. 4 выданні, у тым ліку “Евангелле вучыцельнае” Канстанцінопальскага Патрыярха Каліста, выйшлі на старабеларускай мове. Кнігі распаўсюджваліся ў Беларусі і Украіне, часткова вывозіліся ў Расію. Кіравалі друкарняй Лявонцій Карповіч (да 1620), затым ігумен Еўеўскага Успенскага манастыра друкар Гаўрыіл Іванавіч. Друкарня была найбуйнейшай у гісторыі беларускага брацкага кнігадрукавання. У 1652 г. яна спыніла сваю дзейнасць у выніку войнаў і паслаблення Свята-Духава брацтва.
