10 снежня Андрэй Уладзіміравіч Ціхаміраў, загадчык аддзела навукова-даследчай і экспазіцыйна-выставачнай работы нашага музея, правёў экскурсію “Святло міноры ў старажытнай Гародне: сімволіка Вялікай харальнай сінагогі” для карыстальнікаў Спецыяльнай бібліятэкі для людзей з парушэннямі зроку. На працягу дзвюх гадзін удзельнікі, якія не маюць магчымасці бачыць, даведваліся мноства новых фактаў: якое адрозненне паміж менорай і ханукіяй, як традыцыйна гуляюць у дрэйдлы, для чаго патрэбны кідушны кубак, як выкарыстоўваюцца трашчоткі і калі ў 2024 годзе яўрэі ўсяго свету будуць адзначаць Хануку. Людзі, якія жывуць у цемры, дакрануліся да ўнікальных прадметаў побыту, якія былі прадстаўлены габрэйскай абшчынай нашага горада.
У нашым музеі заўсёды шчыра рады падзяліцца з людзьмі, якія маюць патрэбу ва ўвазе і клопаце, часцінкай сваёй любові да беларускай гісторыі. Супрацоўнікі ганарацца тым, што могуць прапанаваць праграмы, падчас якіх кожны адчувае сябе камфортна і ўпэўнена. Мы працягваем пашыраць нашыя магчымасці, каб усе жыхары і госці горада Гродна змаглі пагрузіцца ў багатую культуру нашай краіны. Правядзенне такіх інклюзіўных экскурсій – важны крок у бок павышэння даступнасці музейных праектаў. Гэта дае магчымасць людзям з абмежаванымі магчымасцямі далучыцца да гісторыі нароўні з іншымі катэгорыямі грамадзян.
