Гродзенскі дзяржаўны музей гісторыі рэлігіі запрашае наведаць
выставу “Мода. Вдохновлять. Блистать. Мечтать” з прыватнай калекцыі
Таццяны Фядосавай– члена Саюза дызайнераў Беларусі, стыліста. Прадметы
з калекцыі экспанаваліся на выстаўках у Гомелі, Магілёве, Нясвіжы, Мінску,
а зараз сустрэча з яе вялікасцю Прыгажосцю, непадуладнай часу і прасторы,
чакае жыхароў і гасцей г. Гродназ 18 лютага па 17 мая 2025 г. у трох
выставачных залах.
Выстава пагружае ў гісторыю мінулых стагоддзяў, знаёміць з
культурнымі традыцыямі розных эпох і краін, гісторыяй іх захавання і
творчага пераасэнсавання кожным новым пакаленнем. Праз адзенне,
прадметы і рэчы, якія акружалі чалавека на працягу стагоддзяў,
раскрываецца гістарычны шлях грамадства, развіццё этычных нормаў
паводзін і пачуцця прыгажосці, захаванне пазачасавых каштоўнасцей.
Калекцыя Таццяны Фядосавай уключае жаночае ўбранне сяр. ХIХ –
кан. XX ст, знакавыя ўзоры аксесуараў, начыння для парфумы і касметыкі
сусветных і айчынных вытворцаў, мастацкі жывапіс і графіку, захоўвае
ўнікальныя гісторыі стварэння і стваральнікаў. Разам з калекцыяй Таццяны
Фядосавай будуць прадстаўлены і прадметы ХIХ – пач. XX ст. са збораў
музея гісторыі рэлігіі: жывапіс, парцаляна, мастацкія вырабы з металу з
калекцыі дэкаратыўна-прыкладнога мастацтва, старажытная мэбля, якая
дэманструецца наведвальнікам упершыню.
На выставе будзе экспанавацца больш за 700 (семсот) прадметаў
музейнага значэння, сярод якіх тыяра з чорнага вугальнага шкла 1-й пал.
ХIХ ст., якая адпраўляе нас да часоў каралевы Вікторыі і моды на чорныя
тыяры, “залатая” прыдворная сукенка (Сourtdress) канца XIX ст. – парадны
строй, адпаведны правілам каралеўскага двара (на працягу XIXст. галоўнай
рысай гэтага ўбрання быў доўгі шлейф, які пазней пераходзіць у вячэрнюю
моду); калье 1970-х як адлюстраванне ўсеагульнага захаплення скарбамі з
грабніцы Тутанхамона, упрыгожанні ад моднага дызайнера 1960-х Хэці
Карнегі, натхнёнай мастацтвам адкрытых стражытных цывілізацый Мексікі, і
шмат іншых прадметаў, якія гатовы да дыялогу з намі, сучаснікамі і
стваральнікамі сённяшняй эпохі.
